14 taun, pengawa bumai lalu enda mansang pegai Jabu

--by Jimmy Adit
PERENING SARAWAK: Plan ngambika Sarawak badu meli beras lalu ulih bejual ngagai nengeri luar, enti nyema baka urang ti peresa sekula, udah pil.
Ketuai DAP Chong Chieng Jen, maya bejaku di Dewan Undangan Negeri minggu tu tadi, nyemetak minta Modernisation of Agriculture Minister Alfred Jabu, diketu lalu diganti.
Ku Chong, plannya udah bejalai 14 taun tang anang ngumbai ka bejual, beras ungkup pakai rayat menuatu pin enda chukup.
Aruh iya ga YB Kota Sentosa nya enda puas ati laban udah lepas 14 taun, Sarawak mengkang meli beras ari nengeri luar taja pin duit munyika bejuta-juta udah dikena nulung urang bumai tang asil nadai ga berubah.
President Joko “Jokowi” Widodo netapka menua sida badu meli beras dalam dua taun ti ka datai laban Indonesia, ku ia, ulih nanam lalu ngisi peminta rayat 100%.
Kena nangkup plan iya, Jokowi udah ngagih Rp8.2 trillion (US$656 million) kena ngaga serta miki empang enggau parit ai lalu nyendia benih enggau baja.
Indonesia, ku iya, mega deka badu ngimpot jagung enggau kachang soya dalam masa sama.
“Utai tu diguna rayat nya alai tu meh plan lumur satu kitai,” ku Jokowi maya bejaku chara deka nupi lebih kurang 237.6 million rayat Indonesia (nitih census 2010).
Kena March 20, 2012, The Star bisi madah taja duit mayuh dibuai ngagai urang bumai tiap taun, tanah alai bumai makin kusut.
Di Malaya semak 100,000ha tanah umai udah dikena begagaka rumah enggau kilang; di Sabah enggau Sarawak 6,000ha.
Bah enti tanah umai kitai makin mit, ni gaya ketau kitai tau betambah? Sedangkan rakyat makin bertambah!
Bakati nyaut tanya tu, State Agriculture Department director Lai Kui Fong minta perintah ngagih duit mayuh agi kena ngaga sistem tali ai enggau research and development (R & D).
Tang sigi ga tu ti digaga Jabu ngelamatu – nadai tali ai, gaga tali ai; penemu baru dalam hal betanam padi mega enda kurang udah dipejalaika nyengkaum ngeluar benih lebih manah.
Pia mega duit enda mega kurang. Nundaka repot Financial Times April 20, 2008, prime minister mayanya, Abdullah Ahmad Badawi, bisi ngemendarka RM1.3 million awakka Sarawak ulih nambah sawah baka di  Bijat/Stumbin, Lingga/Banting, Daro, Nanga Merit, Pulau Baruit, Paloh, Sungai Seblak and Limbang. Pemesai semua sawahtu 43,821ha.
Empai setaun udahnya, kena Sept 21, 2009, Deputy Agriculture and Agro-based Industry Minister Rohani Abdul Karim madah federal government udah meri RM161 million ngagai Sarawak kena ngemansang pengawa bumai.
Duitnya enggau RM1.3 million ti dikemendar Badawi baka ti lalu nadai ngeluarka asil.
President Parti Rakyat Sarawak (PRS) Dr James Masing bisi udah mansut penemu madahka nadai kebuah Sarawak enda tetanam ka padi chukup kena nupi rayat laban tanah endur bumai bisi, duit munyi ti suah disebut chukup mayuh, pia mega mensia semina 2.5 million.
Ku iya, enti China tetupika 1.4 billion rayat menuanya, nadai kebuah Sarawak enda ulih ngada beras ka rayat ti semina 2.5 million.
Ku iya, penanggul nengeri tu, ukai nadai tanah, ukai nadai duit tang pengering politik nadai tetangkupka penemu ti peneka ngeluar ari mulut.
Taja pan Masing enda nyemetak nyebut baka Chong, kuing jakunya sigi nuju menteri ti nadai pengering ati ka bebendar ngemansangka mensia ti bumai-taun.
Sigi patut bendar diperundingka perintah Kepala Menteri Adenan Satem pengeran Chong ti minta ngemaduka Jabu, laban enti agi baka ke udah, ni pan penyampau duit dibuai ngagai sector bumai, ketau kitai tetap enda lebih lalu kitai pan enda putus-putus meli beras ari Vietnam, Thailand enggau Pakistan.
Sarawak udah chukup pengerugi enda tepajuka sektor bumai dalam 14 taun ti udah, sampai bila kitai tan rugi bakatu?
-theantdaily 13 Dec 2015